الشاعرة / إيمان محمد العطيفي
لاموني الناس على حبك
وقالوا : إيش تحبي فيه؟!!
لا واد عمك
ولا خالك !!
ولا فى العشق
خيالك !!
ولا سلطان مابين ناسك
تعيشي العمر
تفخري بيه!!!
لمست القلب بإيديه
يا ساكن بين وريد القلب
والتنهيدة … والنني
وحبي ليك معذبني
وشوقي ليك مجنني
يا كحله بعيني ساحراهم
من الحساد أداريها
وما يدروا…
بأن السحر بعيوني
عشان طيفك
سكن فيها
يا راسم فوق شفايفي الوردى
ضحكاية
ومن غيرك
ما بضحكهاش
وجوه قليبي لك صورة
على الحيطه معلقها
يموووووت
لو لحظه ما يشفهاش
وبيعدوا سنين عمري!!؟
وانا عمري اللى من قبلك
نسي عمره
لا مات
ولا عاش
وقالوا : عليلة
وشقية
دكاتره الطب تشفيها
وأنت الزاد والمية
وروحي مني سابيها
ودائي فيك
وترياقي
قصر من شوق وحنية
وجوه قليبك العاشق
تسكنــّي
وم العالم تخبيني
دكاترة كتير
تروح…تيجي
لكن الطب مش نافع
وقالوا: البت مسحورة
خسارة البت فيه يا ولاد
هاتولها المغربي يداوي
ده سره فى الهوى باتع
وحط إيديه على راسي
ونزلت دمعة من عينه
وقال: عشقاه
ورب الكون
وهي سر تكوينة
كعشق الليلي للمجنون
ومكتوبه على جبينه
ولو عايزين تداوا الورد
قولوا لابوها يمضي العقد
ويعلن م الليالي عشر
يقيم الفرح فى الساحة
وتشفى عليلة الأشواق
وترجع وردة فواحه
لو المأذون بليلة عيد
يجمع بينها وبينه
