عادل التعلب
أقولك سِر ..!!
أول مرة سمعت انا صوتك
كلي اتشد
كن انا وانتي بقالنا سنييين
نعرف بعض
مش حدوتة حب بنظرة
ولا حدوتة عمر و عشرة
اللي بتجمع كل اتنين
سوا علي أرض
بس بجد ..
إنتي بضحكة وكلمة سرقتي
قلبي وعقلي وفكري ووقتي
أيمته وفين وازاي معرفشي
أيون ..أيون ساعة لما نطقتي
لما شفايفك نطقت إسمي
جسمي اتكهرب ..لميت طاقتي
لميت طاقتي من أوردتي
لما فردتي .. لأ .. طوقتي
قلبي بجيش ملايين الجُند
لمي جنودك أنا مستسلم
قدام عودك مين يتكلم
كل راياتي البيضا رافعها
أصلا قبل ما أيدنا تسلم
انتي اللي انا من يوم م انا عشت
وانا بغرامها بصحي وبحلم
هاحضن حبك لو كان شوك
مش راح اسيبه مهما اتألم
بعدك لحظة ..
مرفوض رفض
أصلا بُعدك .. شر الشر
أقولك سِر
شوفت بعيني كتير من قبلك
لكن زيك .. عمري ما شوفت
أيوة حلمت بأني أقابلك
لكن وسط الحلم انا خوفت
ألّم عزالي واجي لقلبك
يطلع قلبك ساكن .. طوفت
سبعة وسبعة كدا حجيتك
بيتك بيتي .. حاولت وصفت
أيوة بصمت ان انا حبيتك
وانتي مضيتي .. أيوة عرفت
يا آخر الصبر
أقولك سِر
قبل ما احبك ..كنت انا حر
قلبي محدش أسره وسجنه
حدش كسره وخسره وفرّ
كان بيصارع موجه العالي
علشان رجله حافظه البر
عمري ما سبته يذلل نفسه
عمره مكنش في يوم مضطر
أقولك سِر
أنا بمجرد ما انا حسيتك
قلبي فارقني وسابني وراحلك
جاني وقاللي أقول حبيتك
علشان كل ما فيا ارتاحلك
قمة سعدي دا لما لقيتك
بتحبيني قبل ما ابوحلك
وعد عليا ان افضل احبك
حتي لآخر يوم في العمر
أقولك سِر
